من طرف lobna الإثنين أكتوبر 27, 2008 12:03 pmانا بنت مصريه عاقله و متربيه
اصيله وجدعه و حقنيه متدينه
مش مهم مسلمه ولا مسيحيه
المهم انى بشكر ربنا على والصحه
واللقمه الهنيه ولمه اهلى حولى
متعلمه ممكن مع*** الأعداديه
او شهاده متوسطه او جاميعه
هتلاقينى فى النجع و البندر
و فى الشارع الواسع
و الحاره الضيقه العشوئيه
ممكن فلاحه اوصعيديه
و ممكن اكون سيناويه
اوساكنه على البحر اسكندريه
مش مهم فقيره ولا غنيه
المهم انى بنت الأرض دى
رضعه عشق ترابها ونيلها
و كل حته فى شورعها
و ناسها الأصله الطيبين
وعاداتنا الحلوه وحضارتنا
وحافظه صم تاريخ بلادنا
بس برضه انا بنت عصريه
وعارفه ايه اللى بيحصل حوليا
بسمع النشره واعرف اخبارالدنيا
وبحاول دايما اغير حاجات
مش حلوه فيا او فى اللى حوليا
و بحب اوى خصالى المصريه
الكريمه الحبوبه المتفتحه الذكيه
متفتحه بس فى عينيها وعقلها
مش فى اخلاقها او لبسها
بحب البس على كل لون
فستان و لا بلوزه وبنطلون
واحيانا البس طرحه وجلابيه
مش مهم البس على الموضه
ولا اقلد لبس ممثله امريكنيه
المهم اكون متغطيه
عشان ماحبش امشى
والناس كلها تبحلق فيا
هيقولوا لازم تكون دى فاطمه
لا دى ايزيس لا طبعا دى سعديه
مش مهم اسمى ولا ايه شكلى
هتلاقينى موجوده فى كل حته
فى الغيط والمصنع والمدرسه
وفى المصلحه الحكوميه
وممكن فى شركات أستثماريه
محبوبه من جيرانى و زمايلى
وفى حالى وطيبه وعشريه
وعمرى ما كنت حشريه
اخلص كل شغلى ميه ميه
وارجع لأمى احكى لها
واسمع منها واساعدها
تدعى لى بالستر والصحه
وبجوازه حلوه وعيشه هنيه
و تقول جارتنا عايزنى لأبنها
والتانيه عايزانى لأبن اختها
و ده عينه على الشباك
وغيره بيخبط على الباب
تقول لى اختارى عريس كويس
طيب وماله الأولنى موظف كبير
عنده مال و خير كتيرولابس هلاهيل
علشان بخيل وعايز صبيه مدبره
و متربيه ولازم تكون صاحبه مهيه
والتانى صايع بيصحى العصريه
ويرجع يطوح وش الصبحيه
وعينه دايما على الريحه والجايه
و الثالت بقى مش عاجبه حاجه
فى البلد دى الجو خانق الحر زايد
ومفيش نضافه ومفيش نظام
ومفيش فايده ولا داعى للمحاوله
واى جهد هيضيع فشوش
والدنيا زحمه والشعب جاهل
مش ممكن ابدا هيبقى حاجه
وكل همه مستنى فرصه
يهج فيها على حته تانيه
مع السلامه ده حتى احسن
و واحد عمل لى فيها شيخ
ويقول لك ده حلال وده حرام
وفلان ده كافر و غيره فاجر
و دايما ماشى فى الخلق طايح
يضرب اخته ويهب فى امه
وان حد قال له حرام عليك
الرحمه حلوه اهدى واصبر
يثور ويصرخ ويقول
محاضره عن حق ربه
و عذاب الأخره و الدين الصحيح
والناس الكفره اللى مش فاهمين
على ايه ده كله على حاجه هايفه
يفتح الله مالى انا بالدوشه دى
وغيره اعد على القهوه يصرف
بيقول انه تاجر بس شاطر
وبيكسب كتير حسب التساهيل
يغيب ويظهر ويقول مسافر
لا عمره صام ولا يعرف يصلى
لا عنده صاحب ولا له قريب
لا يزور مريض ولاينفع فى زنقه
حياته ماشيه من غير اى لازمه
وفى واحد مستقيم ومركز عظيم
وابن ناس طيبين وعنده شقه
خجول و لخمه ودمه يلطش
و يشفنى يغرق فى شبر ميه
وامه تقول لى البركه فيك
يتنطق بكره على ايديك
انا قلت لا و انا كده مالى
بس امى قلقانه طبعا
و خايفه بكره يقولوا بايره
او طلعه فيها والقطر فاتها
اوفى حاجه شاغله بالها
ايوه فى مش حاجه واحده
حاجات كتير مهمه لى
انا عايزه واحد يليق بيه
ويكون كويس و حنين على
ناجح فى شغله ويخاف ربه
ويحب اهله ومدردح شويه
وطبعه هادى ودمه حامى
مش لازم غنى وعنده عربيه
المهم يفرح بجوازه منى
ويصون كرمتى ويحافط على
يقولوا سيبك ده كان زمان
لما كان العرسان كتيره
و ضل راجل ولا ضل حيطه
بقى ده كلام ينفع يا ناس
قولوا لى انتوا الصح فين
مش كده احسن ولا ايه
منقول....................
